1Cor 6 | GAM | STEP | Ye mor al ge, una ta ye molo age boll kandja ta pandaka, soka po orko una boll kot djimbell kune kaima nayendo, ye kand nagor mo? Soka pillgi dji una moye al po kandja djimbell mal paro.

1 Corinthians 6

Pillgi djinj una kandja ta panda ge, yenekne djine, orko una boll nadjine

1 Ye mor al ge, una ta ye molo age boll kandja ta pandaka, soka po orko una boll kot djimbell kune kaima nayendo, ye kand nagor mo? Soka pillgi dji una moye al po kandja djimbell mal paro. 2 Ye nakaninj mo? Are nono God unakye mormon ge, makimb una singare ke yene mal, omuk tambon. Kaima yembon pille, ye pillgi una mor al una ta age boll kandja ta panda ge, ye yenekne djine kune nayendo mo? 3 Tau agelo singare yene mal nono okum tambon. Ye nakaninj mo? Nono kaima yembon pille, makimb al kandja panda mal, ye djine kune yenda mal paro. 4 Embe mal ge, ye pillgi djinj una mor al orko una kandjine ta naparo ba ye yenekne kandja ta pandaka, ye ipo una orko boll kot djine ge kune nayendo. 5 Na kandja embe djindo ge, ye ngandjill goye dje pille djindo. Pillgi una soka yenekne kandja ta panda ba, ye mor al, una ta nomane wopake pandaka, wo kot piya naparo mo? 6 Una ta moya moro ba, ye embe nayenj. Orko una nalene al, pillgi dji una ta ye molo age kot ye aundo.

7 Pillgi una ta ye molo age ta kot ye aunda ge, embe kanbon; ye kulngab yagi pora dji dje kanbon. Embe nayene. Una ta ye ke ye awi dal, ye kandja nadjine. Una ta wo ye wal ngunjo i nane ge, ye kane kerne. 8 Ba ye singare embe nayenj, ye embe yenj: una mor al ye singare ke ye awo, kambono walene ye po ngunjo i no embe yenj. Ba ga mor ge ye agane mor!

9 Ye nakaninj mo? God dumoye kantau yendo al ge, singare ke yenj una er pakna napine. Ye yenekne kandja kende dje naine. Iwana gaklene ulle pille pla ye waninj una ne, god kende lotu ye awinj una ne, iwana djingjang ke yenj una ne, kondwe ana yenj mal embe iwa po iwa ta boll embe yenj una ne, iwana djingdjang yenj mal iwa yenekne boll djingdjang embe yenj una ne, 10 kunumb nonj una ne, una wal merke i nambon dje pille yenj una ne, nu nonj una ne, una kandjine abir una ne, una kandja kende iwo wal ngunjo i nonj una, ga porapora mor ge, God dumoye kantau yendo al, er pakna napine. 11 Ga singare ke yei mal, ye una pende asa singare ke embe yei. Ba, Iwa Kerman Jisas Krais kandjiye al, God Murble yembe yei al ge, God ye was ye awika, ye une unakye kaima moi. God nale al ye wambo naparo, ye kiwa mor.

12 Una pende embe djinj, no singare porapora yembon ge mapill naparo, we djinj. Ba na kandja embe djindo, ye singare pende yene al ge ye wopake namoye. Na singare porapora yeno, kune yendo we djino. Ba na djino al ge, wal ke na kantau ye i menameto woro djinda. 13 Una pende embe djinj, kwa mokna ge kumbene wal, alla kumbene ge kwa mokna wal we djinj ba ege are ta yendaka, God kwa mokna ne, nonekne gaklene soka aike to pora djinda. Alla, nono gaklene ge iwana djingdjang gaklene napanda. Nono God boll aike mopon gaklene panda. Alla God ge, une nono gaklene al moya. 14 God yene yembe dongall pai al, Iwa Kerman golo pai ge, i pla woro awi. Alla une nono i pla worda eri. 15 Krais gakle pakna paro ge nono kerker dje mormon dje ye nakaninj mo? Krais gakle kerker paro ge, na ipo kondwe ana boll moyo mo? Ge man! 16 Una ta po kondwe ana boll moya ge, soka gaklene taimane panda dje ye nakaninj mo? Baibel kandja embe djindo,

Iwana soka gaklene taimane panda we dji.

(Stat 2:24)

17 Ba alla una ta Iwa Kerman boll moya ge, une Iwa Kerman nomane boll aike moya.

18 Iwana djingdjang yenj mal ge, ye seke pine! Singare ke porapora yero ge, una yenekne gaklene al orko to yenj. Ba alla iwana djingdjang yenj ge, yenekne gaklene al singare ke yenj. 19 Ye gaklene al ge, God Murble numbiye mal embe yero. God ye awika yene Murble ye boll moro mal, ye nakaninj mo? Ye gaklene ge, ye yenekne wal, man. 20 God ye i yem wori ge, une top kerman ke awo, ye i yem wori. Embe mal ge, ye gaklene al singare yene ge, ye God kandjiye kerman panda dje singare embe yene.